Arotakenga: Angelique Kasmara

Ko Jessica Hansell, e mōhiotia ana ko Coco Solid, arā ko tana ingoa rapi, tētahi o ngā hautipua o te ao toi i Aotearoa. He maha te hunga o te ao whānui e piripono ana ki a ia, ahakoa Coco Solid, Parallel Dance Ensemble, Badd Energy me Fanau Spa rānei. Ko Coco Solid te ūpoko o te kamupene hopu puoro o Kuini Qontrol, ā, koia tētahi o ngā ringatohu o te wāhi hapori o Onehunga, o Wheke Fortress.  Nāna te pakiwaituhi tāoreore o Aroha Bridge i waihanga ā, kua tuhi hoki ia mō ngā whakaari pouaka whakaata pērā i a Wellington Paranormal me Ahikāroa.

I tīmata a Hansell ki te tuhi i How To Loiter In A Turf War i a ia e mahi ana hei tohunga tuhi mō te Fulbright-Creative New Zealand Pacific i te University of Hawaii i te tau 2018.  He māmā noa iho te tāhū: e toru ngā hoa e hāereere ana i Tāmaki Makaurau i te raumati tino wera, e whakahaere ana i ngā take ā-tuakiri, ā-whānau me ngā take ratonga pahi.

E taututetute ana ngā kōrero me ngā rotarota, ngā tīpako kōrero mai i te kaituhi pohewa, ngaio hoki a Piopi Ruta-Chris, ngā tānga rārangi me tētahi whakaaturanga whakaahua mō ngā kohinga whānui a Hansell (arā ko tana kiripuaki ko “Rosina”), me te aha he pānuitanga tere.  Ahakoa e kīia ana he ‘pakimaero’ i runga i te uhi, te āhua nei he pakimaero poto, ā, e hono ana ki te turekore whakamemeha i te momo tuhinga o te ahurea whakapuaki whaiaro me ngā mātākōrero tūroa.

E whakaata ana te whakaurunga o ētahi atu momo toi i ngā tāuteutetanga o ngā kiripuaki matua e toru kua āta whakaahuatia: arā ko te kaiwhakataki a Te Hoia, he ākonga mātai tōrangapū arero koi ka kitea e tāuteute ana i ngā kohinga kōrero a Ruta-Chris, Q te kaitito toikupu e kore mō te whakaae he pērā, me te ringatoi wewehi a Rosina. He manawataki ngākau reka, ngākau hihiko hoki tō te reo roto o Te Hoia:

“Ko tāku hoki he kaha ake te whakarongo kōrero a ngā Atua Māori me te Piripino i ō ētahi atu Atua.

He aha au i whiwhi ai i tēnei huinga?

Ka tū rātou ki te puna o te oranga anō nei he mihini wai.

E whakataurite kōrero ana me ngā Atua Kirīki mō aku whakaaro pōrangi.”

Kei te tīmatanga o te tuhinga tētahi kāpeka o tētahi mākete tipumāori kei tētahi wāhi kaingaki māra Hainamana, kaitui kākahu hoki o mua. Ka taukumekume a Te Hoia rāua ko Q me tētahi kaiwhakaputa tipumāori i reira mō te tōtiti me te parāoa e kainga ana e rāua, e whakaatu ana i te āhua o ngā riri moroiti ka whakahaeretia ai e rāua:

“— …Māu e tātai - mēnā e taea ana.

Ka raupeka te kanohi o Te Hoia.

— ‘Mēnā e taea ana’?

Ka pōturi haere te wā, ka hohoro hoki i te wā kotahi, he pērā ngā momo tautohetohe pēnei.”

I te wāhanga whai muri ka tirotiro te tokotoru rā i tētahi whakaaturanga toi ā-rōpū, ko te kaupapa ko te whakapai ake i te wāhi tāone. I roto i tēnei, ka whakawhānuitia te kaupapa o te whakapai ake i te wāhi tāone me te whakawhanake whare e hono pū ana ki te taipūwhenuatanga. Ko Rosina anahe te ringatoi kiri parauri o te whakaaturanga, ahakoa e tū ana te whakaaturanga ki te wāhi i reira te toa kākahu kura o tana matua i mua, i whakahaere hoki i tētahi kaupapa koha kākahu kura, taputapu kura hoki ki ngā tamariki rawakore i reira.

“I ngākaunui, i mōhio pai hoki te hapori ki te koroua o Rosina i mua i tana matenga. Heoi anō i ana tau whakamutunga, i whakakinohia anō nei he kāraroraro nāna ‘te whakarauoratanga’ i whakaroaroa.

Ka whai ake ko tētahi kāpeka e āta tirotirohia ana, arā ko Rosina rāua ko tētahi atu ringatoi, a Paul. Ka memeha haere tana hiahia ki a ia i te “ohonga ake o tana rongo ā-manawa”. Ka memeha tonu i muri i tana whakamārama tika, hātekēhi hoki mō te take i whakatauhia e ia kia kaua e tō mai i te kaihaumanu arowai ki te whakaatu i ngā “colonial colonics” hei wāhanga o te whakaaturanga.

He āhua poto tētahi o ngā wāhanga, arā ko Are You Ok? He whakaohorere, he māhukihuki te raupapatanga moemoea i whakaritea hei whakaahua i ngā hapa o te reo, me tō tātou koretake ki te whakamomori.  He pērā anō ngā titonga a Kamran mō ngā ngoikoretanga reo i roto i a *Curry* *Burgers* *Kebabs* *Pizza* *Fried Chicken* otirā ko te kaupapa ko ngā kōrero orokohanga iwi taketake.

He tuhipoka mō te whakatakotoranga: ka whakamahia ngā tohuwhai roa hei tohu i ngā kōrero, heoi anō, kāore i āta whakatakotohia i runga i te whārangi, ka peke kē ki waenganui (ina kōrero tētahi atu), engari i ētahi wā ka kore, me te aha he uaua te whai haere i ngā kōrero me te mōhio ko wai te kaikōrero. Ka kitea ētahi atu rerekētanga kua kore e kite mēnā i āta whakatikahia, heoi anō he pōreareatanga iti noa iho ēnei i roto i tēnei pukapuka whakaihiihi, atamai hoki.

Nā Angelique Kasmara

Nā Tamati Waaka (Ngāti Pūkeko, Te Whānau ā Apanui, Tūhoe) i whakamāori